Маънавиятни шакллантиришда оиланинг ўрни

• 

Подробности

Бўлим: Долзарб мавзу

Чиққан санаси: 02 Апрель 2013

(Нашр қилинган санаси)

 

 

 

Миллатнинг маънавиятини шакллантириш ва юксалтиришда оиланинг ўрни ва таъсири алоҳида аҳамият касб этади. Инсон одамийлик фазилатлари, одоб-ахлоқ ва илк тарбияни шубҳасиз  оилада кўради. Оиланинг бош бўғини эса албатта, ота-она. Ота-она фарзандига ҳар томонлама, жумладан, маънавият ва маърифат борасида ҳам  ибрат бўлиши шарт. Зеро, донишманд ўзбегимиз айтади: “Қуш уясида кўрганини қилади.” Эътибор беряпсизми, кўрганини дейиляпти, эшитганини эмас! Фарзандингизга “китоб ўқи!”, “шеър ёдла!” “бу қўшиқни эшитма, мана бунисини эшит”, “у фильмни кўрма, бунисини томоша қил” қабилида буйруқ бергандан кўра, унга ёшига мос, дунёқарашининг кенгайишига, келажак ҳаётига асқотадиган китоблар совға қилиш, шунингдек, кино, театр, музейлар каби маданий ҳордиқларга ўзингиз олиб борганингиз яхшироқ самара беради.  Хўш, сиз қачон кундалик ташвишлардан, тирикчилик югур-югурларидан вақт орттириб, фарзандларингизни етаклаб, оилавий бўлиб театр ё музей томошаларига боргандингиз?..

Ҳатто эслай ҳам олмаяпсиз а? Ҳа, ҳаёт ташвишларидан жилла қурса, икки соат вақт ажратиб фарзандларимизнинг маънавий дунёсини бойитиш, дунёқарашини юксалтириш, аждодлардан қолган бой маданий меросимизни болаларингизга танитиш учун ўзинмизни бағишлай олмаймиз... Хўш, фарзандимиз маънавий тарбияни кимдан ўргансин? У аждодларидан қолган маданий мерос ҳақида кимдан маълумот олсин, Тўғри, таълим муассасаларида ўқитувчилар бошчилигида ўқувчи ёшлар музей, театр ва киноларга олиб борилади. Аммо, юқорида айтганимиздек, инсоннинг комил инсонга хос туйғулари шаклланиши учун оила муҳити соғлом бўлиши керак. Маънавий соғлом оиладан эса жамиятга юксак маънавиятли, ақлли, билимли, доно кишилар етишиб чиқади.

Бугун Мир Алишер Навойи Ҳазратларининг таваллуд айёми. Бу зотнинг миллатимиз маънавияти, тилимизнинг ривожи борасидаги хайрли амаллари асрлар оша оҳорини тўкилмай авлоддан авлодга мерос ўтаётгани ҳеч кимга сир эмас. Азиз ватандош, сиз Навойи ҳазратларининг таваллуд айёмлари, нафақат бу тарихий сана муносабати билан, умуман, ҳеч бўлмаганда йилда икки-уч бора фарзандларингиз даврасида у зотни хотирлаганмисиз? Шаҳримизда Навоий ҳазратларининг номи билан аталадиган хиёбон, театр, метро бекати ва албатта музей мавжуд. Сиз фарзандларингизни етаклаб, номлари келтирилган масканларга борганмисиз? Айнан шу жойда туриб, фарзандингизга Навойи бобомиз ҳақида ўз билганингизча гапириб берганмисиз?..
Агар ҳозирга қадар бу юмушни адо этмаган бўлсангиз, унда сиз учун эртага ажойиб имконият. Дам олиш кунлари Навоий бобомизнинг таваллуд кунлари муносабати билан уларнинг бой адабий мерослари сақланажак маскан- музейга болаларингиз ва албатта ўзингиз учун сайёҳат уюштирсангиз ҳам руҳингизда енгиллик сезасиз, ҳам фарзандингиз дунёқарашида янгича бир олам кашф этасиз. Нима дедингиз?..