Турли атир ва дезодорантлардан истифода қилиш жоизми?

• 

Подробности

Бўлим: Фатволар

Чиққан санаси: 16 Июнь 2013

(Нашр қилинган санаси)

 

 

 

Ҳурматли шайх ҳазратлари! Қилаётган хайрли ишларингизга Аллоҳ улкан ажрлар ато этсин. Сизга бир савол билан мурожаат қилмоқчи эдим. Суннатга мувофиқ хушбўйланиб юраман, деган одам қандай воситалардан фойдаланиши керак?
Спирт қўшиб тайёрланадиган атирлар, дезодарантлар ва шунга ўхшаш нарсаларнинг ҳукми қандай? Уларни ишлатса ва сотса, жоизми?

ЖАВОБ: Бисмиллаҳир Роҳманир Роҳийм
Иложи борича хушбўй нарсаларни ишлатиш пайидан бўлиш лозим. Уламолар, жумладан, замондош уламолар: «Хушбўй нарсаларнинг хушбўйлигини тутиб туриш учун қўшилган спиртнинг зарари йўқ, бундай атирларни ишлатиш жоиз, дейишган.
Эътиборингизга Қувайтдаги «Тиббий Илмлар Исломий Муассасаси» ўтказган илмий анжуман қабул қилган қарордан иқтибос келтирамиз:
«Тиббий маънода ва тиббий ниятда тайёрлаб қўйилган спиртларни ҳиди яхши бўладиган атирлар учун ишлатиш жоиз. Чунки бу ердаги атирга қўшиладиган баъзи бир моддалар фақат ана ўша спирт билангина эриши мумкин.
Шунингдек, баъзи бир кремларга ҳам мана шу нарса ишлатилади. Бу, ичиладиган, маст қилиш учун тайёрлаб қўйилган хамр – ароқ ҳукмига кирмайди. Аммо, алкогол нарса маст қилувчи модда бўлгани учун, уни ичмоқ, тановул қилмоқ мутлақо ҳаромдир».
Ишлатиш жоиз бўлган нарсани сотиш ҳам жоиз бўлади. Бу маънода фатволар жуда кўп. Валлоҳу аълам.